Eph 2 | GbrGAW | STEP | Nsa dohoi fye ɓei fi n Shekwoyi knitu sinta, n zunkni zhi nyalonyalo ntu n fye alaifi ɓo.

Ephesians 2

Sapai Nsayiye-yi

1 Nsa dohoi fye ɓei fi n Shekwoyi knitu sinta, n zunkni zhi nyalonyalo ntu n fye alaifi ɓo. 2 Fye ɓei gni zan-zan n begye yi, n gye azaje, n nu-nuyi n na laifiyi, fyei zhin Satan ɓeye, esu dnagmayi anyi bmana nya, n wo zhin tnu-tnu lo n saiye n na aza bugba, n ɓa zhin gaba n Dagayi nyi. 3 Yi ɓei wu lo nu n sapai, eyi ase-se yi wu enya n kwo dna n yi mi, yi zhin aɓo nukwoyi doho-hohoyi shi eyi a shakpe, kwo eyi a nubo zhin nukwoyi gnayi. Yi ɓei ya n tna bmiya yi shi a ɓei mayi n nayi nukwoyi, nfi n Shekwoyi minagyi sinta ngye zaho-zahoi.

4 Ama Shekwoyi n sun-sun gye mwa, wa yeyi n mwa. 5 Kwo da yake, yi ɓei fi-fiyi n zafun, akni zun yi ntu eyi alaifi ɓo, wa ga yi eyi a wye-wyei n jesun esanu n wo ɓei la Kristi kala n efi, ntu n wo ye-ye ɓo nu yi ku gni-gni bwa. 6 Wa kuyi kala n vingwo fi n mwa-mwa n gnisun n Kristi yi. Aba n yi sase n gnisun n woi n eshe mi, ntu nya ɓo n Yesu Kristi ɓei zhin nyi. 7 Nsaiye Shekwoyi ɓa mi wa wuyi misali shi wo alheri mwa, n gye shi wa wuyi dna n nya n wa zhin gayi, dna n Yesu Kristi nyi.

8 Ntu n wo alheri ɓo ala fye gni, n tu gefya ga Kristi gaiciya, gaiciya ga n kwo nyi kwo to zhin efye nya nu n, kwo zhin Shekwoyi cauta nu n wa ga fye. 9 Gni-gni to zhin lada, ntu ɓemana zhin ɓo nun, n ya zhin n ntu cenu, zaho-zahoi to kunce lo a sawo ami da cen. 10 Shekwoyi nu na zhin yi, yi ze anya n yi ku ze n saiye nyi, woi gayi wye-wyeyi dna n Kristi Yesu. Tunyi n sapa nu n wa zhin shiri ye, ntu ge ya bma azaje zhin dna n wye-wyeyi ye, n yi la bwa nyi.

11 Fye to ze amwi n ge nsapai fye ɓei zhin aza nu n tna kaciya, a Yahudiyi ɓai yi fye ge aza nɓa ta wo Shekwoyi dnan, aza tna gyi-gyi (ama oɓa bugba ce, ɓei ye tu cegye koda yake ɓa ɓei zhin ɓai zhin aɓo ngye a Shekwoyi dnawo yi, gama ɓa ɓei zhin ɓai zhin kaciya, tuze nu nge ɓa zhin Shekwoyi anya.) 12 Fye pa ge nsapai fye ɓei nyi n tna Yesu, fye ɓei zhin Shekwoyi aɓi nuwunyin nu, woi to ɓei zhin fye alkawalin n wo ɓa bma fye zhin ma, fye ɓei ku bwi n tna Shekwoyi, n tna awyetu.

13 Ama nsaiye, fye zhin Yesu Kristi anya nu, kwo shi kwo nyi fye ɓei mwa kpa n Shekwoyi, n saiye aku ɓe n fyei vi-viyi n woi, ntu n nya ɓo n Yesu Kristi wa zhin ga yi n wo amiyi nyi.

Yesu La Yi Tagyi Do

14 Gama Kristi nu zhin zokwo eyi bugba fu nya. Wo la yi ga jedoɓe na Yahudiyi yi n fyei abyedo, woi zeyi zaknayi aɓi, ngye shi wa ɓa nyakunpa ya n kwo ɓei n yi gna aje nyi. 15 Owo fi la nuwun gmiya, n kwo ɓei dna n yi atasin nyi, n na Yahudiyi awyidna ɓei ɓe n cei n na byedo bwayi gmi-gmi ya nyi, gama wa fi n na bai wa zo zokwo yi nu, wa ku aza n gun abaye n ɓa ɓei zhin ɓai zhin gaba n na ajeyi nyi, wa zeɓa owohin nya. Wato wo la yi ye ɓedo ya ze oza woi-woi gmanyi, n sayi bugbafu yi la ɓe. 16 Shi yi ku ze aga nayi gmanyi nya nyi, minagyi n kwo ɓei dna n na tasin nyi kwo ku zo, wo la yi ga jedoɓe n Shekwoyi, ngye shi wa fi tu n zundu ntu yi ɓo. 17 Woi la ɓe fye n Nabari manayi bugbafu nya yi efye abyedo, nfye ɓei mwa kpa n woi nyi, eyi a Yahudiyi yi ɓei wo viviyi n woi. 18 Nsaiye eyi vinya, ko Yahudiyi kwo abyedo, ɓami wa ɓe Shekwoyi Dada aba, n Zafun Gyi-gyi-yi bmazhin yi, ntu n nya ɓo n Kristi ku zhin ga yi nyi.

19 Nsaiye fye to zhin a zhiɓei nu n Shekwoyi aban, kwo a zhiɓei n; eshen, ama fye zhin Shekwoyi apuwa da nu, Shekwoyi-kni aɓi, fye zhin Shekwoyi puwa azanu, n gnisun n a Yesu viyi ajei.

20 Fye gni agni kpe n sayi n nyakun goro manayi nu, atnu-tnuyi n na nabiyi. Nyakun bwakwonu kuta ho, Yesu Kristi nu n wohin tukwo yi. 21 Eyi n ya ga gaiciya nyi akuyi ɓedo peceiye n Kristi yi, n gye nyakun manayi n kwo mwa cici ntu Shekwoyi ɓo. 22 Akuyi ɓedo n woi n yi azajei dna n Zafun, yi-i ku ze Shekwoyi ase-se ba.